AQRAR SAHƏ: “AĞ QIZIL-2017”

​Artıq xeyli vaxtdır ki, rayonumuzun  aqrar  sektorunda çalışanlar aylardan bəri  tarlalarda çəkdikləri zəhmətin, sərf etdikləri gərgin  əməyin şirin  bəhrəsi kimi becərdikləri “ağ qızıl”ın kütləvi  yığımına start vermişlər  Bolluq-bərəkət qədəmli  payız fəsli öz gəlişi ilə təbiəti qızılı rəngə boyamaqla yanaşı həm də elimizin qiymətli  sərvəti kimi şöhrət qazanmış ucsuz-bucaqsız    pambıq  tarlalarının  inkişafına və pambığın optimal müddətdə yetişməsinə də həlledici təsir göstərmişdir. Məhz bu fəsildə kolların üzərindəki saysız-hesabsız qozalar sürətlə pardaqlanıb  açılır,  tarlalar zümrüd  libasını dəyişərək  ağ günlərdən xəbər verən ağ örpəyə bürünür.  Pambıq  yığımı kampaniyasına  adətən sentyabr ayında geniş vüsət verilsə də  rayonumuzun bir sıra kəndli-fermer təsərrüfatlarında erkən  açılmış məhsulun əllə yığımına hələ avqust ayından başlanmışdır.Belə pay torpaq sahiblərindən  biri də Qoyunbinəsi kəndindən olan iş adamı, kəndli-fermer təsərrüfatının rəhbəri İsrayıl Hüseynovdur. Uzun  illərdir ki, taleyini iqtisadiyyatın  başlıca şahələrindən  olan  kənd təsərrüfatına, mal-qara saxlamağa, əkinə-biçinə, dənli və texniki  bitkilər yetişdirməklə ərzaq  bolluğu yaratmağa həsr etmiş bu zəhmət  adamı barədə ən müfəssəl  məlumatı “MKT-Yevlax” filialının direktoru,  ömrü-günü  kənd-kəsəkdə, pambıq əkini sahələrində keçən Şaban  Həsənovdan  aldıq. O, bildirdi ki, pambıqçılığın sərfəli olduğu qənaətinə gələn İsrayıl  bizimlə müqavilə bağlayaraq bu ildən etibarən öz kənd təsərrüfatı biznesini pambıqçılıqla daha  da  genişləndirmək arzusunda olduğunu dedi. Beləliklə öhdəsində olan pay torpaq sahəsinin  12 hektarında yaz-əkin kampaniyası dövründə “ağ qızıl” plantasiyası saldı. Şaban müəllim bizi “Niva” markalı xidməti minik  maşını ilə  Qoyunbinəsi  kəndinə-haqqında xoş niyyətlə söhbət açdığı İsrayılın pambıq tarlasına apardı. İlk öncə yolumuzu  məhsulu əllə yığılması nəzərdə tutulmuş 5 hektarlıq pambıq sahəsindən saldıq. Sentyabrın 12-nə təsadüf edən bu səfər zamanı  kəndin zəhmət adamları, qəlblərinin hökmü ilə və ailə büdcələrini  daha da artırmaq məqsədi ilə  böyük həvəslə sahələrə çıxmışdılar.Gəlişimizin məqsədini bildirdikdə pambıqçı qız-gəlinlərdən Xəyalə Kərimova, Rahilə Məhərrəmova, Günel Məmmədova, Aynurə Ağayeva, Nuridə  Ağayeva və onlarla birlikdə pambıq  yığan  qardaşımız  Əlfayım  Abışov  ilk  ürəkdolusu alqışlarını möhtərəm  Prezidentimiz  İlham Əliyev cənablarına   ünvanladılar. Dövlət başçısının  son illər ölkədə  pambıqçılığı, bütövlükdə  aqrar  sahəni  inkişaf  etdirməklə insanların peşə məşğuliyyətini təmin  etmək, üstəlik ailə büdcələrini artırmaq, yaşayış  güzaranlarını yaxşılaşdırmaq üçün göstərdiyi müstəsna qayğı və diqqətdən hədsiz razı qaldıqlarını söylədilər. Onlar iş adamı, həmkəndliləri İsrayıl Hüseynovun xeyirxahlığından, hamıya qarşı səmimi, həm də çörək verən adam olduğundan danışmağı da unutmadılar. Elə bu məqamda İsrayıl da  söhbətinin üstünə gəlib  çıxdı. Hamı ilə görüşüb pambıqçılarla hal-əhval tutduqdan sonra sevincini gizlədə bilməyərək dedi ki, indiyədək çəkdiyimiz zəhmət hədər getməyib. Gördüyünüz kimi sahəmizdə pambıq aşıb – daşır. Bir neçə gündür ki, əllə pambıq yığımına başlamışıq. Qapanın başındaca onların topladıqları pambığın haqqı ödənilir. Gördüyünüz bu qız-gəlinlərin əlləri də yığdıqları “ağ qızıl” kimi qızıldır. Hamısı sürət ustası kimi tanınır. Hər biri gündə qapana ən azı 120-150 kiloqram məhsul qoyur. Hələlik sahələrə az adam çıxır. Ancaq  kənddə bizim kollektivə qoşulmaq, əlavə gəlir əldə  etmək istəyənlər çoxdur. Ehtiyac yaranarsa onların da gücündən istifadə edəcəyik. Köməyə gələnləri pambıq sahəsinə gətirib-aparmaq üçün xüsusi  nəqliyyat vasitəsi də ayırmışıq. Sizi inandırıram ki, bu gedişlə hər hektarın məhsuldarlığı 35-40 sentnerdən aşağı enməyəcək.Əldə  etdikləri  uğurlarda “MKT-Yevlax” filialının direktoru Şaban Həsənovun aqronom Məhərrəm Hüseynovun xidmətlərinin böyük olduğunu xüsusi vurğalayan fermer təsərrüfatının rəhbəri bildirdi ki, onların zəngin mütəxəssis məsləhətləri ilə tezlilklə yığımı maşınla nəzərdə tutulmuş 7 hektarlıq pambıq sahəsində defolyasiya (yarpaqların dərmanla tökdürürlməsi) işi aparılacaqdır. Sonra bol məhsullu tarlaları gəzirik. Ölkəyə valyuta gətirəcək el sərvətinin bolluğunu gördükcə ürəyimiz riqqətə  gəlir.Cəmi bircə təsərrüfatın pambıq tarlalarında qarşılaşdığımız  xoş və ürəkaçan mənzərədən  sonra qətiyyətlə əmin olduq  ki, rayonumuzun  pambıqçıları cari ildə əkib-becərdikləri 2168 hektar pambıq sahəsindən 4000 tondan çox mühüm strateji əhəmiyyətli məhsul toplayıb   emal  müəssisələrinə təhvil  verməklə rekord nəticəyə imza atacaqlar İşiniz avand, məhsulunuz bol, gəliriniz çox olsun, əziz pambıqçılar!