Yevlaxda Şəhid Polkovnik-leytenant Soltan Məmmədovun doğum gününə həsr edilmiş tədbir keçirilmişdir
22 iyul 2023 | 14:48
Yevlaxda Şəhid Polkovnik-leytenant Soltan Məmmədovun doğum gününə həsr edilmiş tədbir keçirilmişdir
Yevlax Şəhər İcra Hakimiyyətinin, Mərkəzi Aran Regional Mədəniyyət İdarəsinin tabeliyində olan Yevlax Şəhər Mədəniyyət Mərkəzinin filialı Şəhər Yaradıcılıq evinin dəstəyi ilə “Zəfər” Şəhid ailələrinə dəstək İctimai Birliyi tərəfindən “Qəhrəmanlar unudulmur” layihəsi çərçivəsində Yevlax şəhər B.Səfəroğlu adına Xalq teatrında, Vətən müharibəsinin Yevlaxdan olan şəhidi Polkovnik-leytenant Məmmədov Soltan Akif oğlunun doğum gününə həsr edilmiş tədbir keçirilmişdir. Tədbirdə Yevlax Şəhər İcra Hakimiyyəti Başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Xaliq Əliyev, Respublikanın xalq artisti Samir Cəfərov, Vətən müharibəsi qəhrəmanı Azər Abdullazadə, Şəhid Soltan Məmmədovun və digər şəhidlərin ailə üzvləri, rayon ziyalıları , qazilər, ictimaiyyət nümayəndələri iştirak etmişlər.
Tədbiri giriş sözü ilə açan Azərbaycan Respublikasının Əməkdar Mədəniyyət işçisi Eldəniz Mustafayev şəhidin şərəfli ömür yolundan danışaraq, qəhrəmanların ölmədiklərini, daim qəlblərdə yaşadıqlarını bildirdi. Dövlət himnimiz səsləndirildikdən sonra iştirakçılar vətən uğrunda canından keçmiş şəhidlərimizin xatirəsini bir dəqiqəlik sükutla yad edilib.
Sonra söz şəhidin həyat yoldaşı Tünzalə Məmmədova çıxış edərək bütün iştirakçıları salamladı, Soltan Məmmədovla həm həyat yoldaşı, həm sirdaş kimi fəxr etdiyini qeyd etdi. Öz növbəsində tədbirdə iştirak edən hər bir şəxsə minnətdarlığını bildirdi.
Yevlax Şəhər İcra Hakimiyyəti Başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Xaliq Əliyev, Mərkəzi Aran Regional Təhsil İdarəsinin müdiri Elçin Kərimov çıxışlarında Şəhidin əziz xatirəsini ehtiramlarını bildirərək Soltan Məmmədov kimi oğullarımızla qürur hissi keçirdiklərini, Möhtərəm Prezidentimiz, Müzəffər Ali Baş Komandan cənab İlham Əliyevin rəhbərliyi altında Vətən müharibəsində qazanılan şanlı Qələbənin Azərbaycan tarixində qızıl hərflərlə yazıldığını qeyd etdilər.
Daha sonra Şəhid Soltan Məmmədovun döyüş yoldaşları onun keçdiyi şərəfli və qəhrəmanlıqlarla dolu döyüş yolundan ətraflı danışdılar.
Azərbaycan Xalq artisti, Opera-Balet teatrının solisti Samir Cəfərovun ,Əməkdar Mədəniyyət işçisi, Şəhər Yaradıcılıq evinin direktoru Zöhrə Adgözəlovanın, Bəşir Səfəroğlu adına “Xalq” teatrının aktyorlarının, xanəndə Sabir Hüseynovun, Azərbaycan Respublikasının Əməkdar Mədəniyyət işçisi Eldəniz Mustafayevin ifasında vətənpərvərlik mövzusunda şerlər və mahnılar ifa edildi. Şəhid Soltan Məmmədovun döyüş yolundan bəhs edən videoçarx nümayiş etdirildi.
Qeyd edək ki, Məmmədov Soltan Akif oğlu 1981-ci il iyulun 21-də Yevlax rayonunun Səmədabad kəndində anadan olub. Şəhid Soltan Məmmədov Ali Hərbi Ümumqoşun Komandirlər Məktəbini bitirib və çox peşəkar bir hərbiçi olub. Soltan Məmmədov oktyabrın 10-da Suqovuşan döyüşləri zamanı şəhid olub. Yevlax Şəhər Şəhidlər Xiyabanında dəfn olunub. Şəhid Soltan Məmmədov Azərbaycan Respublikasının Prezidenti, Müzəffər Ali Baş Komandan cənab İlham Əliyevin Sərəncamları ilə ölümündən sonra “Azərbaycan bayrağı” ordeni, “Vətən uğrunda” "Laçının azad olunmasına görə", "Suqovuşanın azad olunmasına görə" medalları ilə təltif edilmişdir.
Keçidlər
