Vətən müharibəsi Şəhidinin doğum günü qeyd edildi
31 iyul 2023 | 19:12
Vətən müharibəsi Şəhidinin doğum günü qeyd edildi
Yevlax Şəhər İcra Hakimiyyəti tərəfindən Vətən müharibəsi zamanı Vətənimizin azadlığı,ərazi bütövlüyümüz uğrunda gedən döyüşlərdə şəhidlik zirvəsinə ucalan şəhidlərimizin doğum və anım günlərində onların ailələrinin, məzarlarının ziyarət olunması ənənə halını alıb. Ənənənin davamı olaraq Vətən Müharibəsində şəhidlik zirvəsinə ucalmış Mirzəyev Elçin Maqsud oğlunun doğum günü Yevlax şəhər Şəhidlər Xiyabanındakı məzarı önündə Şəhər İcra Hakimiyyəti Başçısı aparatının məsul şəxsləri və şəhidin ailə üzvləri birlikdə qeyd olundu. İştirakçılar tərəfindən Şəhidin məzarı üzərinə gül dəstələri düzüldü, əziz xatirəsi ehtiramla yad olundu.
Şəhər İcra Hakimiyyəti Başçısı aparatının məsul əməkdaşı, Vətən müharibəsi veteranı Vasif İsayev Şəhidin ailə üzvlərinə başsağlığı verərək, Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusunun qüdrətindən,qazanılan Şanlı Qələbədən, şəhidlərimizin döyüş zamanı göstərdiyi şücaətdən söz açdı. Həmçinin vətənimizin bütövlüyü uğrunda mübarizədə canlarından keçmiş şəhidlərin əziz xatirəsinin qədirbilən xalqımız tərəfindən daim uca tutulacağını qeyd etdi.
Şəhidin ailə üzvləri onlara göstərilən diqqət və qayğıya görə Ölkə Prezidenti, Müzəffər Ali Baş Komandan cənab İlham Əliyevə və Birinci vitse-prezident hörmətli Mehriban xanım Əliyevaya öz minnətarlıqlarını bildirdilər.
Keçidlər
