PREZİDENT İLHAM ƏLİYEVİN REYTİNQİ YÜKSƏK OLARAQ QALIR
Azərbaycan Prezidenti İlham Əliyevin reytinqi yüksək olaraq qalır. «Rəy» Monitorinq Mərkəzinin məlumatına görə, Mərkəzin bu günlərdə Bakıda keçirdiyi «Omnibus» tipli ictimai rəy sorğusunun nəticələri göstərir ki, paytaxt əhalisinin əksəriyyəti ölkə başçısını dəstəkləyir.
Sorğu zamanı məlum olub ki, Prezident seçkiləri gələn bazar günü keçirilsəydi, səsvermə məntəqələrinə gələcək respondentlərin əksəriyyəti (83%) öz səsini hazırkı ölkə başçısına verərdi. Bakı sakinlərinin 65 %-i Azərbaycan Prezidenti postunda İlham Əliyevə alternativ görmürlər.
Respondentlərin 82%-i «İlham Əliyev sizin kimi insanların maraqlarına cavab verirmi» sualını müsbət cavablandırıb («tam» və ya «qismən» cavab verir). Rəyi soruşulanların 68%-i isə ölkədə işlərin düzgün istiqamətdə getdiyini düşünür. «Omnibus» tipli ictimai rəy sorğusu 2014-cü il oktyabrın 17- dən 21-dək keçirilib. Yaşayış yeri üzrə üzbəüz müsahibə yolu ilə keçirilən sorğuya 18 yaşdan yuxarı 1300-ə yaxın sakin cəlb olunub. Sorğu nəticələrinin statistik nisbi xətası 3,4 %-dən çox deyil.
