Yevlaxda Regional filial yaradıldı

21-ci əsr idarəetmə sistemində də modernləşmə, yeni idarəetmə modellərinin yaranmasını zəruri edir. Əsas məqsədi vətəndaş məmnunluğuna hesablanan, daha çevik idarəetmənin təkmilləşdirilməsinə yönəlmiş olan yeni  dəyişiklər müasir dövrümüzün əsas tələbidir.
Azərbaycan Respublikası Prezidentinin 27 apel 2021-ci il tarixli “Rəqəmsal transformasiya sahəsində idarəetmənin təkmilləşdirilməsi haqqında” Fərmanına uyğun olaraq, həmçinin korporativ idarəetmə prinsipləri nəzərə alınaraq  Nəqliyyat,  Rabitə  və  Yüksək  Texnologiyalar  Nazirliyi  “Aztelekom”  Məhdud Məsuliyyətli Cəmiyyətinin strukturuna daxil olan region filialların yaradılmasına başlanıldı.  Bu məqsədlə ilk Regional Filial Yevlaxda yaradıldı.
Nəqliyyat,  Rabitə  və  Yüksək  Texnologiyalar  Nazirinin müavini Rövşən Rüstəmovun, Yevlax Şəhər İcra Hakimiyyətinin Başçısı Anar Tağıyevin, nazirliyin aparat rəhbəri Samir Məmmədovun və “Aztelekom” MMC-nin Baş direktor müavini Elman Həsənovun  iştirakı ilə  karantin qaydalarının tələblərinə əməl edilməklə keçirilən iclasda “Aztelekom”un strukturunda mərkəzi Yevlax şəhərində olmaqla Regional filialın yaradılması elan olundu. Yevlax filialının adı dəyişdirilərək “Yevlax regional filalı“na adlandırıldı. Bundan sonra pilot layihəyə əsasən Yevlax, Mingəçevir, Goranboy, Naftalan, Bərdə, Tərtər və Ağdam filiallarının hazırki xidmət əraziləri Regional filialın xidmət əraziləri hesab olunacaq.