HEYDƏR ƏLİYEV-95
VƏTƏNİ CANINDAN ÇOX SEVƏN DAHİ
Müdrik və uzaqgörən siyasəti ilə müstəqil Azərbaycanımızın ən yeni tarixinə parlaq səhifələr yazmış. bununla da haqlı olaraq çoxmilyonlu xalqının tükənməz məhəbbətini qazanmış görkəmli dövlət və ictimai xadim Heydər Əliyevin anadan olmasının 95-ci ildönümü mayın 10-da tamam oldu. Bu munasibətlə ulu öndərin adını daşıyan baş meydan həmişəki kimi bayramsayağı bəzədilmiş, lap erkən işə salınmış büllurgözlü fəvvarələrdən süzülən su şırnaqları günəşin zərrin şüaları altında minbir rəngə çalmaqla yanaşı ətrafa bir sərinlik yayır, ulu öndərin ad günü təntənəsinə tam hazır vəziyyətə gətirildiyini bildirirdi.
Əlamətdar tarixi günlər və ictimai tədbirlər məskəni olan baş meydan həmin gün əllərində ətirli gül-çiçəklə rəhbərin ad gününü, əziz xatirəsini ehtiramla yad etməyə gələn insan kütləsinin ixtiyarına verilmişdi. Vəzifəsindən və ictimai mənşəyindən asılı olmayaraq hər kəs böyük sevgi ilə ümumşəhər tədbirinin başlanacağı anı gözləyirdi.
Səhər saat 11-dir. İlk öncə Şəhər İcra Hakimiyyətinin Başçısı Qoca Səmədov, hüquq-mühafizə, rəsmi dovlət, ictimai-siyasi və xidmət idarələrinin rəhbərləri ümummmilli liderin möhtəşəm abidəsi önünə təzə-tər güllər, qərənfillər düzdülər və dahi şəxsiyyətə ehtiramla təzim etdilər. Sonra abidə önündən polis, fövqəladə hallar, vergi, gömrük, təhsil, səhiyyə, mədəniyyət, icra və bələdiyyə qurumlarının, idarə-müəssisə təşkilatları kollektivlərinin, ağsaqqalların, müharibə və əmək veteranlarının, ictimaiyyət nümayəndələrinin aramsız keçidi başladı.
Rəhbərin yubileyi şərəfinə saatlarla davam edən təntənəli mərasim başa çatdıqdan sonra iştirakçılar Heydər Əliyev Mərkəzində oldular. Rəhbərin həyat və fəaliyyətini əks etdirən foto – stendlər və tarixi sənədlərlə tanış oldular.
Sonra Mərkəzin ikinci mərtəbəsindəki geniş foyedə ulu öndərin büstu qarşısında ümummilli liderin anadan olmasının 95-ci ildönümü münasibətilə YAP Yevlax rayon təşkilatının Şəhər Təhsil Şöbəsi ilə birlikdə məktəblilər arasında keçirdikləri inşa yazı müsabiqəsinin qaliblərinə iştirakçıların təntənəli alqışları altında diplom, fəxri fərman və hədiyyələr təqdim olundu.
Vətənini canından artıq sevən dahinin ad gününə həsr olunmuş ümumşəhər tədbiri Heydər Əliyev Mərkəzinin konfrans zalında “Heydər Əliyev və dövlət quruculuğu” mövzusunda çəkilmiş video-süjetin təqdimatı ilə yekunlaşdı.
Günün sonunda isə Kür çayı sahilindəki bülvar istirahət kompleksində mədəniyyət işçiləri böyük bayram konserti ilə insanlarda xoş ovqat yaratdılar.
Beləcə əbədiyaşar liderin daha bir ad gününü müqəddəs ruhu ilə birgə qeyd etdik. Lakin əsrlər keçsə də qədirbilən xalqımız dünya şöhrətli siyasi xadimin, Vətənimizi şöhrətləndirən böyük şəxsiyyətin xatirəsnini daim əziz tutacaqdır.