“AĞ QIZIL-2018”

YAZ-ƏKİN KAMPANİYASI QARŞISINDA

Təqvimdən qopan hər vərəq yurdumuza bolluq-bərəkət fəslinin qədəm basdığı yaz-əkin kampaniyasının başlayacağı  anı daha da yaxınlaşdırır. Hələlik şum traktorlarının səsi-sədası yayılan münbit və bərəkətli əkin sahələri bir qədər də keçəcək bolluq yaradan kənd  əməkçilərinin ixtiyarına verilməklə qaynar iş meydanına çevriləcəkdir. Aqrar sektorun bütün sahələrində  olduğu kimi, pambıqçılığın da inkişafını   diqqətdə  saxlayan  zəhmət  adamları səpinə  hazırlıq işlərinə başlamışlar.
“Rayon Kənd Təsərrüfatı” MMC-dən aldığımız məlumata görə indiyədək 1152 hektarda pambıq yetişdirmək məqsədi ilə kəndli-fermer və pay torpaq sahibləri ilə   razılaşma müqaviləsi imzalanmışdır. Halbuki bu il üçün 1000 hektarda qiymətli strateji əhəmiyyət kəsb edən məhsulun yetişdirilməsi  müəyyənləşdirilmişdi.
İndiyədək pambıq əkini üçün  nəzərdə  tutulmuş sahələrin 886 hektarında  keyfiyyətli  şum  aparılmış, bu proses ardıcıl davam etdirilir. Hətta cari ilin pambıq əkini   üçün  bəri başdan MMC tərəfindən lifli və lifsiz çiyid toxumunun sifariş edildiyi də bildirildi.

“MKT-Yevlax” MMC- nin xətti ilə “ağ qızıl” becərmək  istəyənlər də qarşıdan gələn    mövsümə ciddi-cəhdlə hazırlıq  işlərinə start vermişlər. Bu il 1500 hektarda ölkəyə valyuta gətirəcək  məhsulun yetişdirilməsini müəyyənləşdirmiş “ağ qızıl” ustaları pambıqçılığın texnologiyasından maksimum bəhrələnməklə uğurlarını təzələmək  əzmi ilə çalışırlar. Artıq 1500 hektarın 1400  hektarına yaxın sahəsinin keyfiyyətli şumlanaraq növbəti əkin və becərmə əməliyyatlarına hazırlanması da cari ildə pambıqçılıqda müsbət dəyişikliklər olacağına inam yaradır.