AQRAR SAHƏ: “AĞ QIZIL-2018”
SAHƏLƏR SƏPİNƏ HAZIRLANIR
Pambıqçılıqda keçən ilki geriliyin əvəzini çıxmaq üçün Yevlax Rayon Kənd Təssərrüfatı İdarəsinin nəzdindəki “Kənd Təsərrüfatı” MMC-nin xətti ilə bu il 1000 hektarda mühüm strateji məhsulun bünövrəsinin qoyulması nəzərdə tutulmuşdur.
İdarənin bitkiçilik sektorunun müdiri Abbasəli Rüstəmovdan aldığımız məlumata görə, fevral ayının 21-dək 68 nəfərlə müqavilə bağlanmışdır. Lakin rayonda pambıqçılıqla məşğul olmaq istəyənlər çoxdur. Çünki pambıqçılığın sərfəli və gəlirli sahə olduğuna inanan kəndli-fermer təsərrüfatları və pay torpaq sahibləri 2018-ci ilin “ağ qızıl” məhsulunun əkininə ciddi önəm verməyə başlamışlar. Məlum olduğu kimi, dövlət başçısının diqqət və qayğısı sayəsində pambığın hər kiloqramının satınlama qiyməti subsidiya ilə birlikdə 0,70 manata qaldırılmışdır ki, bu da aqrar sahədə çalışanların maraqları ilə üst-ustə düşür. Sektor müdiri onu da əlavə etdi ki, pambığın becərilməsi (torpağın arat olunması, suvarılması və bəzi hallarda alaq otlarının vurulması istisna olmaqla) şumdan, torpağa çiyid səpinindən, cərgələr arasına kultivasiya çəkilişindən tutmuş ta məhsulun tarlalardan toplanmasına qədər bütün aqrotexniki tədbirlər Nazirliyin nəzdindəki “Aqrolizinq” ASC-nin Yevlax regional nümayəndəliyinin maşın və mexanizmlərinin köməyi ilə yerinə yetirilir. Mütəxəssislər yerli şəraitə uyğun gəldiyi üçün bu il sahələrə lifli çiyid toxumunun səpilməsini tövsiyə edirlər.
Çiyid səpini kampaniyasının baş- lanmasına hələ xeyli müddət qalmasına baxmayaraq, artıq 500 hektarda keyfiyyətli şum aparılmış və sahələr arat üçün hazırlanır.Əvvəlcədən xəbər verdiyimiz kimi, “MKT-Yevlax” filialı İnnovasiya – fermer təsərrüfatı da daxil olmaqla bu il 1500 hektarda qiymətli texniki bitkinin etibarlı təməlini qoymağı nəzərdə tutmuşdur. Fevralın 21-dək 90 nəfərlə müqavilə şərtləri imzalandığını deyən filialın əməkdaşı Süleyman Süleymanov onu da bildirdi ki, pambıq əkiləcək sahələrin 1070 hektarı öhdəmizdə olan “Conder” və “Nyu Holland” markalı traktorların gücü ilə şumlanıb.Şumlanmış pambıq sahəsinin 450 hektarına arat suyu verilib və bu iş davam etdirilir.Müsahibim pambıq sahələri üçün zəruri olan gübrə və dərman preparatlarının alınmasına ayrılan subsidiyaların həcminin bu ildən daha 30 faiz artırıldığını və pambıq becərənlərə edilən bu güzəştin ölkədə pambıqçılığın inkişafında yeni üfüqlər açdığını bildirdi. O, bu ildən Qarxun kənd icra nümaəyndəliyinin ərazisində pambıq əkini sahələrinin genişləndirilməsinə marağın artdığını da dedi
