26 İyun – Silahlı Qüvvələri Günü təntənə ilə qeyd olunmuşdur

Yevlax  Şəhər İcra  Hakimiyyəti, rəsmi dövlət, mədəniyyət  və  ictimai təşkilatların nümayəndələri ənənəyə sadiq qalaraq iyunun 26-da – Milli Ordumuzun yaranmasının tarixi ildönümu günündə bir sıra hərbi hissələrdə olmuşlar. Şəhər İcra Hakimiyyəti Başçısının müavini Namiq Süleymanovun rəhbərlik etdiyi qrupun üzvləri bu dəfə “N” saylı hərbi hissənin şəxsi  heyəti ilə görüşmüşlər. Hərbi orkestrin  müşaiyəti ilə dövlət himnimizin ifasından sonra bayrama  həsr olunmuş təntənəli tədbir açıq elan edilmişdir. Tribuna önündə ilk çıxış edən hissə komandiri, polkovnik Oruc Abdullayev Ordu günü münasibətilə əsgər və zabitləri təbrik  etmiş,  onlara şərəfli və son dərəcə məsuliyyətli  xidməti vəzifələrində uğurlar, həmçinin xalqımıza tezliklə mənfur düşmən  üzərində möhtəşəm qələbə sevinci yaşamağı arzulamışdır.

Sonra qərargah rəisi Vüsal Nağıyev Azərbaycan Ordusunun keçdiyi şanlı tarixi yolu əks etdirən geniş məruzə ilə çıxış etmişdir.
Yevlax Şəhər İcra hakimiyyəti Başçısınının müavini Namiq Süleymanov Ordu günü  münasibətilə hissənin şəxsi heyətinə ŞİH Başçısı Qoca Səmədovun təbrikini çatdırmış, müstəqil dövlətimizin suverenliyi və ərazi bütövlüyünün keşiyini çəkən rəşadətli vətən oğullarına möhkəm cansağlığı, hərbi xidməti  vəzifələrində uğurlar arzulamışdır.
“Kür” qəzetinin  baş  redaktoru, YAP Yevlax   rayon  təşkilatı  Qadınlar  Şurasının  sədri  Əminə Yusifqızı memarı ulu öndərimiz  Heydər  Əliyev olan  müstəqlil  dövlətimizin  ordu  birləşmələrininin  hər bir  üzvünü səmimi  qəlbdən təbrik etmiş, həyatda ən gözəl nemət olan  cansağlığı  arzulamışdır.
Sonra şəhid ailəsinin nümayəndəsi, Ağdam qaçqını Bəhman  Gülmalıyev və  gizir   Ramiq  Abdulov tribuna alaraq öz ürək sözlərini mübariz ruhlu şeirlə ifadə etmiş, Vətənin ərazi bütövlüyü uğrunda şəhidlik zirvəsinə yüksələnlərin  qisasının tezliklə alınacağı günün lap yaxında olduğuna əminliklərini ifadə etmişlər.
Gələcəyin  generalı olmaq arzusu ilə əlçim-əlçim böyüyən 6 yaşlı  Tunarla 4 yaşlı  Hüseyn Nağıyev qardaşlarının şirin uşaq ləhcəsi ilə “Azərbaycan” və Dövlət  himnimizi əzbərdən söyləmləri bayram tədbirinin gedişini  daha da rövnəqləndirmişdir. Sonra  xidməti vəzifələrində fərqlənənlərə fəxri fərmanlar, təşəkkürlər verilmiş, Şəhər İcra Hakimiyyəti  tərəfindən qiymətli hədiyyələrlə mükfatlandırılmışlar.
Çıxışlar bitdikdən sonra hissənin kəşfiyyatçı əsgərləri özlərinin əlbəyaxa döyüş peşəkarlıqlarını nümayiş etdirmişlər.
Silahlı Qüvvələr gününə həsr olunmuş geniş proqramlı bayram tədbiri Şakir Qədirovun direktoru olduğu Aran qəsəbə musiqi məktəbinin ifasında muğam, mahnı, rəqs və xalq havaları ilə daha canlı keçmiş, əsgərlərlə birgə eyni masa arxasında çeşid-çeşid yeməklərdən ibarət nahardan sonra başa çatmışdır.