Şriftin ölçüsü :

Saytın rəngi :

AQRAR SAHƏ

14 oktyabr 2016 | 16:00

Ölkəmizin   pambıqçılıqla məşğul olan təsərrüfatlarında 2016-cı ilin “ağ qızıl” məhsulu sürətlə yığılır. Rayonumuzun pambıqçıları da yetişdirdikləri qiymətli sərvəti vaxtında və itkisiz toplayıb tədarük məntəqələrinə və emal müəssisələrinə təhvil vermək üçün bütün qüvvələrini bu istiqamətə yönəltmiş, işlərinin əsas  ağırlıq  mərkəzi olaraq ağ örpəyə bürünmüş tarlaları seçmişlər. Sevindirici  haldır ki, aqrar sahədə  çalışanların aylardan bəri çəkdikləri zəhmət hədər getməmiş, ucsuz-bucaqsız  sahələrdə bol məhsul yetişmişdir. Bu isə neçə-neçə kəndli soydaşlarımızın maddi durumunun, sosial şəraitinin daha da yaxşılaşması üçün sərfəli və əlavə qazanc mənbəyi deməkdir.

Payız bolluq-bərəkət fəsli olsa da, bu fəsildə havaların qeyri- sabit, yağmurlu keçməsi böyük zəhmət bahasına hasilə gətirilmiş qiymətli el sərvətinin vaxtında və itkisiz toplanmasını əngəlləyə bilər. Ona görə də pambıqçılıqla məşğul olan 83 kəndli – fermer  və innovasiya fermer təsərrüfatlarının kollektivləri əlverişli keçən hava şəraitindən səmərəli istifadə edir, yığımın tempini durmadan artırırlar. Dövlətimizin  xüsusi diqqət  və qayğısından, onlar üçün edilən güzəştlərdən, ayrılan  subsidiyalardan məqsədyonlü bəhrələnən zəhmət adamları 2016-cı ilin  “ağ qızıl”ı üçün ilin əvvəlində çiyid  səpdikləri 1435 hektardan 3000 ton məhsul  götürəcəklərini təxmin  etmişdilər. Ancaq real vəziyyət daha bol məhsuldan xəbər  verir.  Təkcə onu demək kifayətdir ki, “MKT-İK” ASC- nin qəbul  məntəqələrinə oktyabrın 7-dək 1328 tondan çox qiymətli  xammal təhvil verilmişdir. Pambıqçıları həvəsləndirən, onların ürəyincə olan təqdirəlayiq cəhətlərdən biri də təhvil verdikləri məhsulun haqqının onlara yerindəcə nağd olaraq ödənilməsidir.

Uzun illər Pambıqtəmizləmə  zavodunda çalışmış, hazırda Yevlax qəbul məntəqəsinin məsul  işçisi kimi fəa- liyyət göstərən Şaban Həsənov pambıqçılıq  sahəsində böyük təcrübəsinə  əsaslanaraq bildirdi ki, hələ tarlaların   demək  olar ki, üçdə bir hissəsinin məhsulu toplanıb. Ağappaq tarlalar isə rayonumuzun  pambıqçılarının sınaq  ilində  daha uğurlu  göstəricilərə  nail  olacaqlarına işarədir.  Ş. Həsənov rayonumuzun    qabaqcıl   pambıqçılarının,  kəndli – fermer təssərrüfatı rəhbərlərinin  adlarını da  çəkdi. Vurğuladı ki, mövsümün əvvəlindən   qəbul məntəqəsinə Nicat Quliyev (Aran qəsəbəsi) 30 hektardan 104, 8 ton, Vaqif Məmmədov (Aran qəsəbəsi)  30 hektardan 101 ton, Mahir Əsgərov (Bünyadabad kəndi) 11 hektardan 35 ton, Qurbanəli Nağıyev (Bünyadabad kəndi) 4 hektardan 10,3 ton, Ceyran Hüseynova (Bünyadabad kəndi) 2 hektardan 4,3 ton, Əliyar Əsgərov (Bünyadabad kəndi) 1,5 hektardan 6,3 ton mühüm strateji  əhəmiyyəti olan məhsul təhvil veriblər. Gördüyünüz kimi, məntəqəyə gələn məhsulların hesabına pambıq tayalarının sayı getdikcə  artır.

Bir sözlə, rayonumuzun zəhmət adamları, torpağa bağlı insanları pambıqçılığın inkişafı sahəsində əvvələr qazandığımız şöhrəti  qaytarmaq üçün  var  qüvvələri ilə çalışır, gələcək illərdə daha möhtəşəm qələbələr qazanmağın etibarlı bünövrəsini elə sınaq ilindəcə qoymaq uğrunda əzmkarlıq nümayiş  etdirirlər.

Məhsulunuz bol, üzünüz yetişdirdiyiniz pambıq kimi ağ olsun, pambıqçılar!

Keçidlər